ಕರಾವಳಿ ವಾಯ್ಸ್ ನ್ಯೂಸ್
ನವದೆಹಲಿ: ಸೆ.28ರಿಂದ 30ರವರೆಗೆ ನಡೆಯಲಿರುವ ಮೂರು ದಿನಗಳ ರಾಷ್ಟ್ರವ್ಯಾಪಿ ಬ್ಯಾಂಕ್ ಮುಷ್ಕರದ ಹಿನ್ನೆಲೆಯಲ್ಲಿ ಕೇಂದ್ರ ಸರ್ಕಾರಿ ನೌಕರರು ಹಾಗೂ ಪಿಂಚಣಿದಾರರಿಗೆ ಸೆಪ್ಟೆಂಬರ್ ತಿಂಗಳ ವೇತನ ಮತ್ತು ಪಿಂಚಣಿಯನ್ನು ಮುಂಚಿತವಾಗಿ ಪಾವತಿಸಲು ಕೇಂದ್ರ ಸರ್ಕಾರ ನಿರ್ಧರಿಸಿದೆ.
ಹಣಕಾಸು ಸಚಿವಾಲಯದ ವೆಚ್ಚ ಇಲಾಖೆ ಲೆಕ್ಕಪತ್ರ ನಿಯಂತ್ರಕ ಜನರಲ್ ಕಚೇರಿ ಸೆ.23ರಂದು ಹೊರಡಿಸಿರುವ ಸೂಚನೆಯಂತೆ, ಸೆಪ್ಟೆಂಬರ್ ತಿಂಗಳ ವೇತನ, ವೇತನಧನ ಮತ್ತು ಪಿಂಚಣಿಯನ್ನು ಸೆ.25ರ ಶುಕ್ರವಾರವೇ ವಿತರಿಸಬಹುದಾಗಿದೆ. ರಕ್ಷಣಾ, ಅಂಚೆ ಮತ್ತು ದೂರಸಂಪರ್ಕ ಸೇರಿದಂತೆ ಎಲ್ಲ ಕೇಂದ್ರ ಸರ್ಕಾರಿ ನೌಕರರು ಹಾಗೂ ಪಿಂಚಣಿದಾರರಿಗೆ ಇದು ಅನ್ವಯಿಸುತ್ತದೆ.
ಬ್ಯಾಂಕ್ ಮುಷ್ಕರದ ಅವಧಿಯಲ್ಲಿ ವಹಿವಾಟಿಗೆ ಅಡಚಣೆಯಾಗುವ ಸಾಧ್ಯತೆ ಹಿನ್ನೆಲೆಯಲ್ಲಿ ಈ ಮುಂಗಡ ಪಾವತಿಗೆ ಅವಕಾಶ ನೀಡಲಾಗಿದೆ. ಇದರ ಜೊತೆಗೆ ಸೆ.26 ನಾಲ್ಕನೇ ಶನಿವಾರ ಹಾಗೂ ಸೆ.27 ರವಿವಾರವಾಗಿರುವುದರಿಂದ ಬ್ಯಾಂಕ್‌ಗಳಿಗೆ ರಜೆ ಇರಲಿದೆ. ಹೀಗಾಗಿ ಸತತ ರಜೆ ಹಾಗೂ ಮುಷ್ಕರದ ಹಿನ್ನೆಲೆಯಲ್ಲಿ ವೇತನ–ಪಿಂಚಣಿ ಪಾವತಿಯನ್ನು ಸೆ.25ರಂದೇ ಮಾಡಿಕೊಳ್ಳಲು ಅವಕಾಶ ಕಲ್ಪಿಸಲಾಗಿದೆ.
ಕೇಂದ್ರ ಸರ್ಕಾರದ ಕೈಗಾರಿಕಾ ನೌಕರರ ಸೆಪ್ಟೆಂಬರ್ ವೇತನವನ್ನೂ ಸೆ.25ರಂದು ಮುಂಚಿತವಾಗಿ ವಿತರಿಸಬಹುದು. ಕೇಂದ್ರ ಸರ್ಕಾರಿ ಪಿಂಚಣಿದಾರರ ಸೆಪ್ಟೆಂಬರ್ ಪಿಂಚಣಿಯನ್ನು ಬ್ಯಾಂಕ್ ಅಥವಾ ಪೇ ಅಂಡ್ ಅಕೌಂಟ್ಸ್ ಕಚೇರಿಗಳ ಮೂಲಕ ಅದೇ ದಿನ ವಿತರಿಸಲು ಸೂಚಿಸಲಾಗಿದೆ.
ಸೆ.25ರಂದು ವಿತರಿಸುವ ಮೊತ್ತವನ್ನು ಮುಂಗಡ ಪಾವತಿ ಎಂದು ಪರಿಗಣಿಸಲಾಗುತ್ತದೆ. ಸೆಪ್ಟೆಂಬರ್ ತಿಂಗಳ ಪೂರ್ಣ ವೇತನ, ವೇತನಧನ ಅಥವಾ ಪಿಂಚಣಿ ಲೆಕ್ಕಾಚಾರ ಪೂರ್ಣಗೊಂಡ ಬಳಿಕ ಅಗತ್ಯವಿದ್ದರೆ ಹೊಂದಾಣಿಕೆ ಮಾಡಲಾಗುತ್ತದೆ. ಹೊಂದಾಣಿಕೆ ಮೊತ್ತವಿದ್ದಲ್ಲಿ ಅಕ್ಟೋಬರ್ 2026ರ ವೇತನದಿಂದ ಕಡಿತಗೊಳಿಸಲಾಗುತ್ತದೆ.
ಸೆ.28ರಿಂದ 30ರವರೆಗೆ ಮುಷ್ಕರ ನಡೆಯಲಿರುವುದರಿಂದ ಹಾಗೂ ಸೆಪ್ಟೆಂಬರ್ ಅಂತ್ಯಕ್ಕೆ ತ್ರೈಮಾಸಿಕ ಮುಕ್ತಾಯವೂ ಇರುವ ಹಿನ್ನೆಲೆಯಲ್ಲಿ, ಆ ಅವಧಿಯಲ್ಲಿ ನಿಗದಿಯಾಗಿರುವ ಪಾವತಿಗಳು ಮತ್ತು ಇತರ ಬ್ಯಾಂಕಿಂಗ್ ವ್ಯವಹಾರಗಳನ್ನು ಸಾಧ್ಯವಾದಷ್ಟು ಮುಂಚಿತವಾಗಿ ಪ್ರಕ್ರಿಯೆಗೊಳಿಸುವಂತೆ ಸಂಬಂಧಪಟ್ಟ ಸಚಿವಾಲಯಗಳು ಮತ್ತು ಇಲಾಖೆಗಳಿಗೂ ಸೂಚಿಸಲಾಗಿದೆ.
