ಕರಾವಳಿ ವಾಯ್ಸ್ ನ್ಯೂಸ್
ಕಾರವಾರ: ಕೈಗಾ ಅಣು ವಿದ್ಯುತ್ ಸ್ಥಾವರದಲ್ಲಿ ವರ್ಷಗಳಿಂದ ದುಡಿಯುತ್ತಿರುವ ಗುತ್ತಿಗೆ ಕಾರ್ಮಿಕರ ಬೇಡಿಕೆಗಳಿಗೆ ಧ್ವನಿಯಾಗಿ ಕೈಗಾ ಕಾರ್ಮಿಕರ ಸಂಘದ ಅಧ್ಯಕ್ಷ ವಿಕೇಶ್ ಎಸ್. ಬಾಂದೇಕರ ಅವರು ಕೇಂದ್ರ ಸಚಿವ ಪ್ರಲ್ಹಾದ್ ಜೋಶಿ ಅವರಿಗೆ ಮನವಿ ಸಲ್ಲಿಸುವ ಮೂಲಕ ಕಾರ್ಮಿಕರ ಸಮಸ್ಯೆಗಳನ್ನು ಸರ್ಕಾರದ ಗಮನಕ್ಕೆ ತಂದಿದ್ದಾರೆ.
ವೇತನ ಭತ್ಯೆ ಪರಿಷ್ಕರಣೆಯಿಂದ ಖಾಯಂ ಉದ್ಯೋಗದವರೆಗೆ ಕಾರ್ಮಿಕರ ಭವಿಷ್ಯಕ್ಕೆ ಸಂಬಂಧಿಸಿದ ಐದು ಪ್ರಮುಖ ಬೇಡಿಕೆಗಳನ್ನು ಮುಂದಿಟ್ಟಿರುವ ಅವರು, ಬಹುದಿನದ ಸಮಸ್ಯೆಗಳಿಗೆ ಪರಿಹಾರ ಕಲ್ಪಿಸುವಂತೆ ಆಗ್ರಹಿಸಿದ್ದಾರೆ.
ಕೈಗಾ ಅಣು ವಿದ್ಯುತ್ ಸ್ಥಾವರದಲ್ಲಿ ಹಲವು ವರ್ಷಗಳಿಂದ ಸೇವೆ ಸಲ್ಲಿಸುತ್ತಿರುವ ಗುತ್ತಿಗೆ ಕಾರ್ಮಿಕರು ವಿವಿಧ ಸಮಸ್ಯೆಗಳನ್ನು ಎದುರಿಸುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ಭಾನುವಾರ ಕಾರವಾರಕ್ಕೆ ಭೇಟಿ ನೀಡಿದ ಕೇಂದ್ರ ಸಚಿವ ಪ್ರಲ್ಹಾದ್ ಜೋಶಿ ಅವರನ್ನು ಭೇಟಿಯಾದ ವಿಕೇಶ್ ಬಾಂದೇಕರ ನೇತೃತ್ವದ ನಿಯೋಗ, ಕಾರ್ಮಿಕರ ಬೇಡಿಕೆಗಳ ಕುರಿತು ಸವಿಸ್ತಾರವಾಗಿ ಮನವರಿಕೆ ಮಾಡಿಕೊಟ್ಟಿತು.
ಕಾರ್ಮಿಕರ ಆರ್ಥಿಕ ಹಿತಾಸಕ್ತಿಗೆ ಒತ್ತು
ಪ್ರಸ್ತುತ ಕಾರ್ಮಿಕರಿಗೆ ನೀಡಲಾಗುತ್ತಿರುವ ವಿಶೇಷ ಸಾರಿಗೆ ಭತ್ಯೆ ಶೇ. 6 ಮತ್ತು ವಿಶೇಷ ಭತ್ಯೆ ಶೇ. 25 ಅನ್ನು 2016ರ ಕನಿಷ್ಠ ವೇತನದ ಬದಲಾಗಿ 2026ರ ಕನಿಷ್ಠ ವೇತನದ ಆಧಾರದಲ್ಲಿ ಪರಿಷ್ಕರಿಸಬೇಕು ಎಂಬುದು ಸಂಘದ ಪ್ರಮುಖ ಬೇಡಿಕೆಯಾಗಿದೆ. ಇದರೊಂದಿಗೆ ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ ಎಲ್ಲ ಸರ್ಕಾರಿ ರಜೆಗಳನ್ನು ವೇತನ ಸಹಿತ ರಜೆಯಾಗಿ ನೀಡುವಂತೆ ಒತ್ತಾಯಿಸಲಾಗಿದೆ.
ಪೊಲೀಸ್ ಪರಿಶೀಲನಾ ಪ್ರಮಾಣಪತ್ರದ ಅವಧಿಯನ್ನು ಒಂದು ವರ್ಷದಿಂದ ಹಿಂದಿನಂತೆ ಮೂರು ವರ್ಷಕ್ಕೆ ವಿಸ್ತರಿಸಬೇಕು. ಪ್ರತಿ ವರ್ಷ ಪ್ರಮಾಣಪತ್ರಕ್ಕಾಗಿ ಕಾರ್ಮಿಕರು ಸುಮಾರು ₹2,000 ವೆಚ್ಚ ಮಾಡಬೇಕಾಗುತ್ತಿರುವುದರಿಂದ ಅವರಿಗೆ ಆರ್ಥಿಕ ಹೊರೆಯಾಗುತ್ತಿದೆ ಎಂಬ ವಿಚಾರವನ್ನೂ ಸಚಿವರ ಗಮನಕ್ಕೆ ತರಲಾಗಿದೆ.
ಹತ್ತು ವರ್ಷ ದುಡಿದವರಿಗೂ ಖಾಯಂ ಉದ್ಯೋಗದ ನಿರೀಕ್ಷೆ
ಕೈಗಾ ಅಣು ವಿದ್ಯುತ್ ಸ್ಥಾವರದ ಒಂದರಿಂದ ನಾಲ್ಕನೇ ಘಟಕಗಳಲ್ಲಿ ಹತ್ತು ವರ್ಷಗಳಿಂದ ಸೇವೆ ಸಲ್ಲಿಸುತ್ತಿರುವ ಪದವೀಧರ, ಡಿಪ್ಲೊಮಾ ಹಾಗೂ ಐಟಿಐ ಅರ್ಹತೆಯ ಅನುಭವಿ ಕಾರ್ಮಿಕರಿಗೆ ಐದು ಮತ್ತು ಆರನೇ ಘಟಕಗಳಲ್ಲಿ ಖಾಯಂ ಉದ್ಯೋಗಾವಕಾಶ ಕಲ್ಪಿಸಬೇಕು ಎಂಬ ಬೇಡಿಕೆಗೂ ವಿಕೇಶ್ ಬಾಂದೇಕರ ಒತ್ತು ನೀಡಿದ್ದಾರೆ. ಜೊತೆಗೆ ಹಿರಿಯ ಕಾರ್ಮಿಕರ ಗ್ರೇಡ್ ಉನ್ನತೀಕರಿಸುವ ಮೂಲಕ ಅವರ ಸೇವಾನುಭವಕ್ಕೆ ಸೂಕ್ತ ಮನ್ನಣೆ ನೀಡಬೇಕು ಎಂದು ಆಗ್ರಹಿಸಿದ್ದಾರೆ.
NPCIL ಆಡಳಿತದೊಂದಿಗೆ ಚರ್ಚಿಸಲು ಮನವಿ
ಕಾರ್ಮಿಕರ ಈ ಐದು ಬೇಡಿಕೆಗಳ ಕುರಿತು NPCIL ಅಧ್ಯಕ್ಷರು ಹಾಗೂ ವ್ಯವಸ್ಥಾಪಕ ನಿರ್ದೇಶಕರೊಂದಿಗೆ ಚರ್ಚಿಸಿ ಸೂಕ್ತ ಕ್ರಮ ಕೈಗೊಳ್ಳುವಂತೆ ಕೇಂದ್ರ ಸಚಿವ ಪ್ರಲ್ಹಾದ್ ಜೋಶಿ ಅವರಿಗೆ ವಿಕೇಶ್ ಬಾಂದೇಕರ ಮತ್ತು ಸಂಘದ ಪ್ರಧಾನ ಕಾರ್ಯದರ್ಶಿ ಕಿರಣ್ ಕೊಠಾರಕರ ಮನವಿ ಮಾಡಿದ್ದಾರೆ.
ಗುತ್ತಿಗೆ ಕಾರ್ಮಿಕರ ಸಮಸ್ಯೆಗಳನ್ನು ಒಗ್ಗಟ್ಟಿನಿಂದ ಸರ್ಕಾರದ ಗಮನಕ್ಕೆ ತರುವ ಮೂಲಕ ಬೇಡಿಕೆಗಳ ಈಡೇರಿಕೆಗೆ ಪ್ರಯತ್ನಿಸಿರುವ ವಿಕೇಶ್ ಬಾಂದೇಕರ ಅವರ ನಡೆ ಕಾರ್ಮಿಕ ವಲಯದಲ್ಲಿ ಮಹತ್ವ ಪಡೆದಿದೆ. ಇದೀಗ ಕೇಂದ್ರ ಸಚಿವರ ಮಧ್ಯಸ್ಥಿಕೆಯಿಂದ ಕಾರ್ಮಿಕರ ಬಹುದಿನದ ಬೇಡಿಕೆಗಳಿಗೆ ಪರಿಹಾರ ದೊರೆಯಲಿದೆಯೇ ಎಂಬ ನಿರೀಕ್ಷೆ ಮೂಡಿದೆ.
ಈ ಸಂದರ್ಭದಲ್ಲಿ ಕೃಷ್ಣ ನಾಯ್ಕ, ಪವನಕುಮಾರ ಸಾನು, ಉದಯ ಪಾಗಿ ಹಾಗೂ ಗಣೇಶ್ ಸಾವಂತ ಉಪಸ್ಥಿತರಿದ್ದರು.
