ಕರಾವಳಿ ವಾಯ್ಸ್ ನ್ಯೂಸ್
ಶಿರಸಿ: ತಾಲ್ಲೂಕಿನ ದಾಸನಕೊಪ್ಪದಲ್ಲಿ ಬಟ್ಟೆ ಅಂಗಡಿಯಲ್ಲಿ ಕಳ್ಳತನ ನಡೆದಿದ್ದು, ಸುಮಾರು ₹1.90 ಲಕ್ಷ ನಗದು ಹಣವನ್ನು ದುಷ್ಕರ್ಮಿಗಳು ಕಳವು ಮಾಡಿಕೊಂಡು ಹೋಗಿರುವ ಘಟನೆ ಬೆಳಕಿಗೆ ಬಂದಿದೆ. ಈ ಸಂಬಂಧ ಬನವಾಸಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ತನಿಖೆ ಮುಂದುವರಿದಿದೆ.
ದೂರುದಾರ ಮಂಜುನಾಥ (37), ಹನುಮಂತಪ್ಪ ವಡ್ಡರ ಅವರ ಪುತ್ರರು, ದಾಸನಕೊಪ್ಪದ ಹೊಸಪೇಟೆ ರಸ್ತೆಯ ನಿವಾಸಿಯಾಗಿದ್ದು, ಕಳೆದ ಏಳು ವರ್ಷಗಳಿಂದ ಶಿರಸಿ–ಹಾವೇರಿ ರಸ್ತೆಯ ದಾಸನಕೊಪ್ಪ ಬಸ್ ನಿಲ್ದಾಣದ ಬಳಿ ‘ಕರಿಯಮ್ಮ ಕ್ಲಾತ್ ಸೆಂಟರ್’ ಎಂಬ ಬಟ್ಟೆ ಅಂಗಡಿಯನ್ನು ನಡೆಸುತ್ತಿದ್ದಾರೆ.
ದೂರುದಾರರು ನೀಡಿದ ಮಾಹಿತಿಯಂತೆ, ಏಪ್ರಿಲ್ 2ರಂದು ಬೆಳಿಗ್ಗೆ ಅಂಗಡಿಯನ್ನು ತೆರೆದ ಬಳಿಕ, ಮಧ್ಯಾಹ್ನ 4 ಗಂಟೆ ಸುಮಾರಿಗೆ ಅಕ್ಕಿಆಲೂರಿಗೆ ತೆರಳುವ ಕಾರಣದಿಂದ ಅಂಗಡಿಯನ್ನು ತಮ್ಮ ಪತ್ನಿ ಕರಿಯಮ್ಮ ಅವರಿಗೆ ಬಿಟ್ಟಿದ್ದರು. ಆ ವೇಳೆ ಒಂದು ತಿಂಗಳ ವ್ಯಾಪಾರದಿಂದ ಸಂಗ್ರಹಿಸಿದ ₹1.90 ಲಕ್ಷ ನಗದು ಹಣವನ್ನು ಕ್ಯಾಶ್ ಕೌಂಟರ್ನಲ್ಲಿ ಇಟ್ಟು ಹೋಗಿದ್ದರು.
ಆ ರಾತ್ರಿ 8.30ಕ್ಕೆ ಪತ್ನಿ ಅಂಗಡಿಯನ್ನು ಮುಚ್ಚಿ ಮನೆಗೆ ತೆರಳಿದ್ದು, ಬಳಿಕ ಏಪ್ರಿಲ್ 3ರಂದು ಬೆಳಿಗ್ಗೆ 9.10ಕ್ಕೆ ಅಂಗಡಿಗೆ ಬಂದಾಗ ಮುಂದಿನ ಬಾಗಿಲಿನ ಬೀಗ ಮುರಿದು ಸ್ವಲ್ಪ ತೆರೆದಿರುವುದು ಕಂಡುಬಂದಿದೆ. ಅನುಮಾನಗೊಂಡ ಮಂಜುನಾಥ ಒಳಗೆ ಹೋಗಿ ಪರಿಶೀಲಿಸಿದಾಗ, ಕ್ಯಾಶ್ ಕೌಂಟರ್ ತೆರೆಯಲ್ಪಟ್ಟು ದಾಖಲೆಗಳು ಚೆಲ್ಲಾಪಿಲ್ಲಿಯಾಗಿ ಬಿದ್ದಿದ್ದು, ನಗದು ಹಣ ಕಾಣೆಯಾಗಿರುವುದು ತಿಳಿದುಬಂದಿದೆ.
ಕಳ್ಳರು ಅಂಗಡಿಯ ಎರಡು ಬೀಗಗಳನ್ನು ಗಟ್ಟಿಯಾದ ವಸ್ತುವಿನಿಂದ ಒಡೆದು ಒಳನುಗ್ಗಿ, ಕ್ಯಾಶ್ ಕೌಂಟರ್ನಲ್ಲಿದ್ದ ₹1.90 ಲಕ್ಷ (₹500 ಮುಖಬೆಲೆಯ 380 ನೋಟುಗಳು) ಹಣವನ್ನು ಕಳವು ಮಾಡಿಕೊಂಡು ಹೋಗಿದ್ದಾರೆ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ.
ಈ ಕುರಿತು ಬನವಾಸಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಆರೋಪಿಗಳ ಪತ್ತೆಗೆ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.
