ಕರಾವಳಿ ವಾಯ್ಸ್ ನ್ಯೂಸ್
ಕಾರವಾರ: ನಗರ ಪ್ರವೇಶಿಸಿದ್ದ ಸುಮಾರು 22 ವರ್ಷದ ಯುವಕನೊಬ್ಬ ಹಲವು ಜನರ ಮೊಬೈಲ್ಗಳ ಮೇಲೆ ಕಣ್ಣು ಹಾಕುತ್ತಿದ್ದಾನೆ. ಇತ್ತೀಚೆಗೆ ಸಂತೋಷ ಗೋವಿಂದ ತಾಮಸೆ (54) ಅವರ ಮೊಬೈಲನ್ನೂ ಕದ್ದುಕೊಂಡು ಪರಾರಿಯಾಗಲು ಯತ್ನಿಸಿದ ಘಟನೆ ಕೋಡಿಭಾಗದ ಶಿವಾಜಿವಾಡದಲ್ಲಿ ಮಂಗಳವಾರ ನಡೆದಿದೆ.
ಅಂಗಡಿ ವ್ಯಾಪಾರ ನಡೆಸಿಕೊಂಡಿರುವ ಸಂತೋಷ ತಾಮಸೆ ಅವರು ಒಪ್ಪೋ A17 ಮೊಬೈಲ್ ಬಳಸುತ್ತಿದ್ದರು. ಡಿಸೆಂಬರ್ 2ರಂದು ಆ ಮೊಬೈಲ್ ಮೇಲೆ ಕಳ್ಳನ ಗಮನ ಹರಿದಂತೆ ತೋರಿದ್ದು, ಮಂಗಳವಾರ ಮಧ್ಯಾಹ್ನ ಅವರು ಶರ್ಟಿನ ಮೇಲ್ಬಾಗದಲ್ಲಿ ಮೊಬೈಲ್ ಇಟ್ಟುಕೊಂಡಿದ್ದಾಗ ತೆಳ್ಳಗಿನ ಶರೀರದ ಅಪರಿಚಿತ ಯುವಕ ಅವರ ಕಿಸೆಗೆ ಕೈ ಹಾಕಿ ಕದಿಯಲು ಪ್ರಯತ್ನಿಸಿದನು.
ಮೊದಲು ಪ್ರಯತ್ನ ವಿಫಲವಾಗಿದ್ದರೂ, ನಂತರ ಮತ್ತೆ ಕೈ ಹಾಕಿ ಮೊಬೈಲ್ ತೆಗೆಯಲು ಆತನಿಗೆ ಸಾಧ್ಯವಾಯಿತು. ತಕ್ಷಣ ‘ಮೊಬೈಲ್ ಕಳ್ಳ… ಮೊಬೈಲ್ ಕಳ್ಳ…!’ ಎಂದು ಸಂತೋಷ ತಾಮಸೆ ಬೊಬ್ಬರಿಸಿದ ಪರಿಣಾಮ ಸ್ಥಳೀಯರು ಸಹಾಯಕ್ಕಾಗಿ ದೌಡಾಯಿಸಿದರು. ಇಬ್ಬರು ವ್ಯಕ್ತಿಗಳು ಕಳ್ಳನನ್ನು ಹಿಂಬಾಲಿಸಿದರೆ, ಸಂತೋಷ ತಾಮಸೆ ಸ್ವತಃ ಆತನ ಹಿಂದೆ ಓಡಿದರು.
ಬೆನ್ನಟ್ಟುತ್ತಿರುವುದನ್ನು ಕಂಡ ಕಳ್ಳ, ಕೈಯಲ್ಲಿದ್ದ ಮೊಬೈಲನ್ನು ರಸ್ತೆಗೆ ಎಸೆದು ಪರಾರಿಯಾದ. ನಂತರವೂ ಸಂತೋಷ ತಾಮಸೆ ಕಾರವಾರದ ಹಲವು ಕಡೆಗಳಲ್ಲಿ ಕಳ್ಳನ ಹುಡುಕಾಟ ನಡೆಸಿದರೂ ಆತನ ಪತ್ತೆಯಾಗಲಿಲ್ಲ.
ಈ ಬಗ್ಗೆ ತಮಗಾದ ಅನುಭವವನ್ನು ಅವರು ಕಾರವಾರ ನಗರ ಠಾಣೆಯಲ್ಲಿ ವಿವರಿಸಿದ್ದು, ಪೊಲೀಸರು ಅಪರಿಚಿತ ಯುವಕನ ವಿರುದ್ಧ ಪ್ರಕರಣ ದಾಖಲಿಸಿದ್ದಾರೆ.
